Ang katarungan/hinungdan kon ngaa nag tuhaw ini.

Madamo nga pangatarungan/rason nga ginhimo ko ini nga "blog". Isa sina amu nga ang hiligaynon/ilonggo nga linguahe/hambal daw madula na tungod kay may ara nga layi nga ginahimo subong sa kongreso nga himuon ang "tagalog" nga pungsudnun nga hambal sa Pilipinas. May mga tinaga nga hiniligaynon/inilonggo nga ginagamit sng mga dumuluong nga indi amu ang buot silingon sa tumandok nga hambalanon sg mga ilonggo. Labi na gid sa bahin sang aton nga tumandok nga pag-amlig sa kaugalingon. Mga kinaadman sng mga katigulangan naton nga kon indi ta pag-amligan madula na lang kay sila waay ga sulat libro ukon indi masulat ang ila tumandok nga cultura sa pahayagan o sa "internet" man. Gani paagi sini nga akon pagsulat kag paghimu sini nga "blog" mapakita man naton ang tumandok nga cultura sang mga ilonggo. Kag sa diri man ipakita nga waay labot sang ilonggo/karay-a/hiligaynon may mga kasimanwa man kita nga mga taga Cebu, Samar, Leyte kag Bohol nga may kaugalingon man nga mga Kultura nga dapat ipabalo sa bilog kalibutan.